வினா விடை

• கோவையில் 2 டிகிரி செல்சியஸ் அளவிற்கு வெப்பத்தை உயர்த்தியது தான் திராவிடக் கட்சிகளின் சாதனை – அண்ணாமலை பேச்சு

அண்ணா, என்னை ஜெயிக்க வைங்க, அடுத்தநாளே இந்த கோவை தொகுதியை திராவிட இயக்கத்தின் துரோகத்தை முறியடித்து பூமியின் வெப்பத்தை குறைத்துக் காட்டுகிறேனா? இல்லையா? என்பதை மட்டும் பாருங்கள். உலகம் முழுவதும் பூமி வெப்பமானதுக்கு யார் காரணம், இந்த திராவிட கட்சிகள் அல்லவா, சவால் விடுகிறேன்.
• எனக்கு கங்கை – கோதாவரி இணைப்பு தான் முக்கியம். கடவுள் என்னிடம் என்ன வரம் வேண்டும் என்று கேட்டால், நான் இதைத்தான் கேட்பேன் – மருத்துவர் இராமதாசு
நீங்கள் பிரதமராக ஆக்கத் துடிக்கும் மோடி இதை செய்யமாட்டார் என்பதால் கடவுளிடம் போயிடீங்களா? ஓகோ நீங்களும் கடவுளிடம் கூட்டணி போடும் கட்சிகளிடம் சேர்ந்திட்டிங்க போல.
• பௌர்ணமிக்குப் பிறகு நல்ல நேரம் 1 மணிக்குள் முடிவதால் வேட்புமனு தாக்கல் செய்வதில் கட்சிகளுக்கு இடையே கடும் போட்டி, மோதல் – செய்தி
ஒரே தொகுதியில் தோற்கிறவர், வெற்றி பெறுகிறவர், டெபாசிட் பறிகொடுக்கிறவர், வெற்றிபெற்று கட்சி மாறுகிறவர்கள் எல்லோரும் அந்த நல்ல நேரத்தில் தான் மனு போடும் நல்லவர்களாகவே இருக்கிறார்கள்.
• தேர்தல் பிரச்சாரம் தொடங்குவதற்கு முன்பு ஒவ்வொரு முறையும் வழிபடும் சென்றாய பெருமாள் கோயிலில் தரிசனம் செய்து பிரச்சாரத்தை தொடங்கினார் எடப்பாடி பழனிச்சாமி – செய்தி
கடந்த நாடாளுமன்றத் தேர்தல் – சட்டமன்றத் தேர்தல் – உள்ளாட்சி தேர்தலில் சென்றாய பெருமாள் வழங்கிய தீர்ப்பை, இந்த தேர்தலிலும் வழங்கி எடப்பாடி பழனிச்சாமியின் தரிசனத்தை நிறைவேற்றுவாராக!
• வேட்புமனு தாக்கலின் போது மாவட்ட ஆட்சியர் உறுதிமொழிப் படிவத்தை படிக்கச் சொன்ன போது எனக்கு தமிழ் வாசிக்கத் தெரியாது என்று விருதுநகர் தொகுதி நாம் தமிழர் வேட்பாளர் கூறியிருக்கிறார் – செய்தி
அதனாலென்ன… என் அன்னை தமிழைப் பழிப்பவனை இந்த மண்ணில் வாழவிட மாட்டேன். நான் ஆட்சிக்கு வந்தால் நாடு கடத்த உத்தரவிடுவேன் என்று கையை உயர்த்தி உரத்தக் குரலில் மூச்சுமுட்ட பேசத் தெரிந்தால் போதும், நீங்களும் நாம் தமிழர் தான்.
• எனது பையில் இருந்த வைரம் பதித்த ராசியான விலையுயர்ந்த பேனாவை காணவில்லை, யாராவது எடுத்திருந்தால் திருப்பிக் கொடுங்கள் – சிவகங்கை பாஜக வேட்பாளர் தேவநாதன் பிரச்சாரத்தில் பேச்சு
ஓட்டு கேட்க போய் பேனாவை கேட்க ஆரம்பிச்சுட்டிங்களே, உங்க ராசி தொடக்க நாளிலே பறிபோய் விட்டது என்று கலங்கிடாதிங்க, அடிச்சு விளையாடுங்க..
• சூரியவம்சம் படத்தில் தேவயானியை கலெக்டராக்கினேன், இப்போது எனது மனைவியை நாடாளுமன்ற உறுப்பினராக்குவேன் – சரத்குமார் பேச்சு
அந்த படத்துக்கு தேர்தல் முடிந்த பிறகு பூஜை போடலாம் சார். படம் நல்லா வரனும்ல அவசரப்படாதிங்க..

பெரியார் முழக்கம் 28032024 இதழ்