கழகத் தொடக்கநாளில் ஜாதியை ஒழிக்க உறுதியேற்பு!

சென்னை:திராவிடர் விடுதலைக் கழகத்தின் 13ஆம் ஆண்டு தொடக்க நாளை முன்னிட்டு சென்னை மாவட்டக் கழக சார்பில் 12.08.2024 திங்கட்கிழமை மாலை 5 மணியளவில் இராயப்பேட்டையில் உள்ள பெரியார் சிலைக்கு மாலை அணிவித்து மரியாதை செலுத்தப்பட்டது.
வரலாற்றுச் சிறப்புமிக்க இந்நிகழ்விற்கு கழகப் பொதுச்செயலாளர் விடுதலை இராசேந்திரன் தலைமை வகித்து, கழகக் கொடியை ஏற்றிவைத்தார்.
பின்னர் தோழர்கள் அனைவரும் உறுதிமொழி எடுத்துக் கொண்டனர்.
இதில் கழக மாநில – மாவட்ட – பகுதிக் கழகப் பொறுப்பாளர்கள் மற்றும் கழகத் தோழர்கள் திரளாகக் கலந்துக் கொண்டனர்.
கோவை:திராவிடர் விடுதலைக் கழகத்தின் 13ஆம் ஆண்டு தொடக்க நாளை முன்னிட்டு கோவை மாவட்டக் கழக சார்பில் காந்திபுரத்தில் உள்ள பெரியார் சிலைக்கு சூலூர் தமிழ்ச்செல்வி தலைமையில் மாலை அணிவித்து மரியாதை செலுத்தப்பட்டது.
பின்னர் கழக மாநகரத் தலைவர் நிர்மல் குமார் உறுதிமொழி வாசிக்க கழகத் தோழர்கள் உறுதிமொழி எடுத்துக் கொண்டனர்.

மேலும் கழகம் கடந்துவந்த பயணத்தையும், எதிர்காலப் பணிகள் குறித்தும் மாவட்டத் தலைவர் மேட்டுப்பாளையம் இராமச்சந்திரன், மாவட்டச் செயலாளர் சூலூர் பன்னீர்செல்வம், மாநகரச் செயலாளர் வெங்கட் ஆகியோர் உரையாற்றினார்கள்.
நிகழ்வில் உக்கடம் கண்ணன் கோவை மாநகரக் கழக வளர்ச்சி நிதியாக ரூ.500/- வழங்கினார். இதில் கிருஷ்ணன், மாதவன், இராஜாமணி, ஸ்டாலின், சதீஷ், நவீன் ஆகியோர் பங்கேற்றனர்.
சேலம்:சேலம் மாநகரக் கழக சார்பில் கழகத்தின் 13வது ஆண்டு தொடக்க நாளை முன்னிட்டு 12.08.2024 அன்று சேலத்தில் உள்ள பெரியார் சிலைக்கு சேலம் கிழக்கு மாவட்டச் செயலாளர் டேவிட் தலைமையில் மாலை அணிவித்து மரியாதை செலுத்தப்பட்டது. பின்னர் அனைவரும் உறுதிமொழி எடுத்துக் கொண்டனர்.
இதில் நகரத் தலைவர் மோ.பாலு, நகரச் செயலாளர் இரா.ஆனந்தி, நகர அமைப்பாளர் த.தேவராஜ், நகரப் பொருளாளர் ஜோ.பிரபு, பரமேஷ்குமார், வெற்றிமுருகன், குமார் ஆகியோர் கலந்து கொண்டனர்.

பெரியார் முழக்கம் 15.08.2024 இதழ்