தலையங்கம் – இது வேத காலம் அல்ல!

தி.மு.க.வின் பவள விழா பொதுக்கூட்டத்தில் பேசிய தி.மு.க. பொதுச்செயலாளர் துரைமுருகன் பார்ப்பன ஆதிக்கம் தொடர்ந்து கொண்டிருப்பதைச் சுட்டிக்காட்டியுள்ளார். அன்று இராஜாஜி இந்தியைத் திணித்தார். இப்போது இருமொழிக் கொள்கையை நீக்க வேண்டுமென்று என்று சொல்லுகிறார்கள். அதே ஜாதிதான் மறைமுகமாக பல காரியங்களைத் தொடர்ந்து செய்கிறது. அண்மையில் ஒன்றிய அரசு இந்தியாவின் சரித்திரத்தை மாற்றி எழுதுவதற்காக குழு ஒன்றை அமைத்துள்ளது. அதில் 17 பேர் இடம்பெற்றுள்ளனர். 3பேர் அரசு அதிகாரிகள், மற்ற 14 பேரும் (பிராமணர்கள்) அதில் ஒருவர் கனடா நாட்டில் வாழும் பிராமணச் சங்கத் தலைவர். வெளிநாட்டிலிருந்து ஆட்களைத் தேடிப்பிடித்திருக்கிறார்கள். ஹரப்பா, மொகஞ்சதாரோ நாகரீகம் திராவிட நாகரீகம்தான். ஆனால் ஆரிய நாகரீகம் அதாவது சரஸ்வதி நாகரீகம் என்று அந்தக் கமிட்டி கூறுகிறது. அந்த இனத்தின் பகை இன்றும் தொடர்கிறது. அது தொடர்ந்தால் திமுக தன் வீரியத்தைக் காட்டும் என்று துரைமுருகன் பேசியுள்ளார்.
உளம் திறந்து உண்மைகளை வெளிப்படுத்திய அமைச்சர் துரைமுருகன் அவர்களைப் பாராட்ட வேண்டும். ஒன்றிய ஆட்சி அதிகார மையம் பார்ப்பனர்களால் சூழப்பட்டிருக்கிறது. இந்துத்துவாவின் உள்ளடக்கமே பார்ப்பனியத்தை அரசு அதிகாரக் கட்டமைப்பாக மாற்றுவது தான். அதன் காரணமாகத்தான் இந்தியைத் தமிழர்கள் மீது திணிக்கிறார்கள். இந்தத் திணிப்பு மொழித்திணிப்பு மட்டுமல்ல, பார்ப்பனியப் பண்பாட்டுத் திணிப்பு என்ற கண்ணோட்டத்தில் தான் பெரியார் இந்தியை எதிர்த்தார். இந்தி வழியாக சமஸ்கிருதப் பார்ப்பனியம் பண்பாட்டில் ஊடுருவி விடும் என்று பெரியார் எச்சரித்தார்.
தமிழ்நாட்டுக் கோயில்களில் குடமுழுக்கில் வைதீகத் திருமணங்களில், பண்டிகைகளில் தமிழர் வீடுகளில் சமஸ்கிருதம் கோலோச்சுகிறது. அதன் வழியாகப் பார்ப்பனர்கள் தமிழர்களின் பண்பாட்டு வாழ்வியலைத் தங்கள் கட்டுப்பாட்டுக்குள் முடக்கியுள்ளனர். தீர்ப்புகள் வழங்கும் உச்சநீதிமன்ற – உயர்நீதிமன்ற நீதிபதிகள் தங்களுடைய வழக்கு எல்லைகளையும் மீறி சனாதனத்தையும் பழமைப் பிற்போக்குக் கருத்துக்களையும் தீர்ப்புகளில் எழுதிக்கொண்டு இருக்கிறார்கள்.
பார்ப்பன ஆதிக்கத்திற்குச் சான்றாக இப்போது ஒரு அறிவிப்பு வெளிவந்திருக்கிறது. வெளிநாடுகளில் உள்ள இந்தியத் தூதரகங்களில் ஒப்பந்த அடிப்படையில் தமிழ் ஆசிரியர்களை நியமிக்க விண்ணப்பங்கள் கோரப்பட்டுள்ளன. இந்தி, சமஸ்கிருதம் தெரிந்த தமிழ் ஆசிரியர்கள் மட்டுமே விண்ணப்பிக்க முடியுமென்று கூறுகிறது ஒன்றியரசின் அறிவிப்பு. இதன் நோக்கம் என்ன? தமிழ், ஆங்கிலம் என்ற தமிழ்நாட்டின் இருமொழிக் கொள்கையை ஏற்க மறுப்பது தானே?. அயல்நாட்டுத் தூதரகங்களில் பணிபுரிய ஆங்கிலம் கூட தெரிந்திருந்திருக்க வேண்டியதில்லை சமஸ்கிருதம் தெரிந்தால் போதும் என்ற கொள்கை பச்சைப் பார்ப்பனியமல்லவா? என்று கேட்கிறோம். அயல்நாட்டுத் தூதரகங்கள் பார்ப்பனிய ஆதிக்கத்தால் நிரம்பி வழிகின்றன. எனவே சமஸ்கிருதம் தேவை என்ற நிபந்தனை வழியாக தமிழ் தெரியும் பார்ப்பனர்களைத் தேர்வு செய்யும் சூழ்ச்சிதான் இதில் அடங்கியிருக்கிறது. இது பாமரர்களுக்குக் கூட புரியும்.
ஆரியர்களை இந்தியாவின் பூர்வீகக் குடிகளாக நிலைநிறுத்த பார்ப்பனர்கள் துடிக்கிறார்கள். சிந்துவெளி நாகரீகம் திராவிட நாகரீகம் என்பது உறுதிப்படுத்தபட்ட ஒன்றாகும். அங்கே கண்டெடுக்கப்பட்ட எழுத்துகள் திராவிட மொழிச் சார்ந்தவை என்று பல ஆய்வாளர்கள் அறிவித்துவிட்டனர். ஹன்டர், காட், ஹீராஸ் பாதிரியார், மார்ஷல், போன்ற பன்னாட்டு ஆய்வாளர்களும் பின்லாந்து அறிஞர் அஸ்கோ பர்ப்பர்போல மற்றும் நோரசாவ் தலைமையில் ஆய்வு செய்த இரஷ்ய அறிஞர்கள் குழுவும் இதை உறுதி செய்துள்ளது. சிந்துவெளியில் கண்டெடுக்கப்பட்ட முத்திரை எழுத்துக்கள் திராவிட மொழி சார்ந்தவை என உறுதிப்படுத்தப்படுத்தியுள்ளது. இதற்காக தமிழ்நாட்டைச் சார்ந்த பத்திரிக்கையாளரும் ஆய்வாளருமான ஐராவதம் மகாதேவன் ஏழாண்டு காலம் கடுமையாக உழைத்து இந்தக் கருத்தை உறுதி செய்துள்ளார். அவர் பிறப்பால் ஒரு பார்ப்பனர் என்பதையும் குறிப்பிட்டாக வேண்டும். 1977-இல் அன்றைய ஒன்றிய அரசு ஐராவதம் மகாதேவன் ஆய்வை மிகச்சிறந்த ஆய்வாக ஏற்று அரசின் தொல்லியல் துறையே அதை நூலாக வெளியிட்டது. எல்லாவற்றையும் விட தமிழ்நாட்டில் சிவகங்கை மாவட்டத்தில் கீழடியில் நடந்த அகழ்வாராய்ச்சிகள், தமிழர் நாகரீகம் திராவிடர் நாகரீகம் இரண்டும் ஒத்தவையாக இருந்ததை உறுதிப்படுத்தியிருப்பதோடு தமிழர்கள் மதம் சாராத வாழ்க்கையை வாழ்ந்திருக்கிறார்கள் என்பதையும் நிலைநிறுத்தி இருக்கிறது.
இதற்கு மாறாக இந்துத்துவப் பார்ப்பனியம் சரஸ்வதி நாகரீகம் என்ற ஒன்றை இப்போது பேசிக்கொண்டிருக்கிறது. வேதங்களில் குறிப்பிடப்படுகிற சரஸ்வதி என்ற ஒரு ஆறு இப்போது பூமிக்கு அடியில் ஓடிக்கொண்டிருக்கிறது கண்களுக்குத் தெரியவில்லை என்ற வரலாற்றுப் புரட்டுக்களைக் கட்டமைத்து வருகிறார்கள். இதைப்பற்றி ஆய்வு செய்வதற்காக பல கோடி ரூபாய் நிதியை ஒதுக்கினார்கள். அரியானாவில் 2015-இல் அம்மாநில அரசு 50 கோடி ரூபாய் இதற்காக ஒதுக்கியது. ஆனால் சரஸ்வதி இன்னும் மீட்டுக்கொண்டு வர முடியவில்லை. இந்த முயற்சிகளின் பின்னால் உள்ள பார்ப்பன அரசியல், போலி அறிவியல் மூடநம்பிக்கைகளை SEARCHING FOR SARASWATHY என்ற ஆவணப்படம் அம்பலப்படுத்தியது. அமெரிக்காவின் நியூயார்க் டைம்ஸ் என்ற பத்திரிக்கையின் மிகப் பிரபலமான ‘ஓபன் டாக்குமென்டரிஸ்’ என்ற ஆவணப் பிரிவு தயாரித்த ஆவணப்படம் இது பாப்ரி மசுதி இருந்த இடத்தில்தான் இராமன் பிறந்தான் என்பதற்காக போலி வரலாறுகளை உருவாக்கியவர்கள் தான், இப்போது வரலாறுகளையும் மாற்றி எழுதத் துடிக்கிறார்கள்.
திராவிட – ஆரியப் போராட்டங்கள் இப்போது வெவ்வேறு வடிவங்களில் தொடர்கின்றன. குருதிக் கலப்பு ஏற்பட்டுள்ளது உண்மைதான் என்றாலும் பண்பாட்டுக் கலப்பு உருவாகாமல் பார்ப்பனர்கள் தங்களைத் தனிமைப்படுத்தி சமூகத்தின் ஆதிக்கச் சக்திகளாக அடையாளப்படுத்துவது ஏன் என்று பெரியார் கேட்டார். இப்போது வரலாற்றை மாற்றி எழுதத் துடிப்பதும் கூட அவர்களின் பார்ப்பனிய மேலாண்மையை நிலை நிறுத்திக்கொள்வதற்காகத்தான். இது வேத காலம் இல்லை என்பதைப் பார்ப்பனர்கள் புரிந்து கொள்ள வேண்டும்.

பெரியார் முழக்கம் 19.09.2024 இதழ்