கருநாடகம் -தென்னகத்தின் குஜராத் கவுரி லங்கேஷ்

மதவெறியின் துப்பாக்கிக் குண்டுக்கு பெங்களூருவில் பலியான கவுரி லங்கேஷ் (இராவணன்) இந்துத்துவா சக்திகளுக்கு எதிராக 2008இல் எழுதிய கட்டுரை:

சமீபத்தில் ஹூப்ளி, ஹொன்னள்ளி ஆகிய இடங்களில் வாகன திருட்டில் ஈடுபட்டதாக மூவர் கைது செய்யப்பட்டனர். இவர்கள் மூவரும் இஸ்லாமியர்களாக இருந்ததால், அடுத்த நாளே, காவல்துறை வட்டாரங்கள் அவர்களைப் பற்றிய செய்தியைக் கசியவிட்டது. அதாவது அவர்கள் மூவரும் நாட்டின் வெவ்வேறு இடங்களில் குண்டுவெடிப்பு நடத்த திட்டமிட்டிருப்பதாக காவல்துறை சந்தேகிப்பதாக அந்த செய்தி சொன்னது.

இந்த ஒரு துணுக்கு போதுமானதாக இருந்தது, ஊடகங்கள் தங்களுடைய சந்தேகக் கதைகளை புனைய. அனைத்து அச்சு ஊடகங்களும், தொலைக்காட்சிகளும் விதிவிலக்கு இல்லாமல் தாங்கள்தான் முதல்முதலாக இந்த அதிர்ச்சிக்குரிய செய்தியை வெளியிடுவதாக பறைசாற்றிக்கொண்டன.

அனைத்து செய்தியாளர்களும் தங்களுடைய கற்பனைத் திறனை வெளிப்படுத்தும் விதமாக, பெயர் சொல்ல விரும்பாத நபர் சொன்னதாகவோ, காவல்துறையின் நம்பத்தகுந்த வட்டாரங்கள் சொன்னதாகவோ, காவல்துறையைச் சேர்ந்த பெயர் சொல்ல விரும்பாத ஒருவர் சொன்னதாகவோ, கர்நாடகத்தின் அரசு செயலகம் அமைந்திருக்கும் விதான் சவுதா, இன்போஸிஸ் மற்றும் ஐபிஎம் நிறுவனங்களை அவர்கள் தகர்க்க திட்ட மிட்டதாகவும் மேலும் பொது இடங்களிலும் இந்து கோயில்களிலும் குண்டு வைக்க திட்ட மிட்டிருந்ததாகவும் செய்தி புனைந்தார்கள்.

இதில் குறிப்பிடத்தக்க விஷயம் என்ன வென்றால், அத்தனை செய்திகளும் இந்த மூன்று மனிதர்களும் ஒசாமா பின்லேடனின் உள்ளூர் ஸ்லீப்பர் செல்களாக (இரகசிய செயல் பாட்டாளர்கள்) இருந்தார்கள் என்றும் லஷ்கர் இ தொய்பா, தடை செய்யப்பட்ட சிமி போன்ற அமைப்புகளில் தொடர்புடையவர்கள் என்றும் சொன்னதுதான். மேலும் இந்த மூவர் அருகாமை யில் உள்ள வனங்களில் ஆயுத பயிற்சியை வழங்கியதாகவும் பாகிஸ்தான் கொடியை ஏற்றியதாகவும் ஆர்டிஎக்ஸ் உள்ளிட்ட வெடிமருந்துகளை பதுக்கி வைத்திருப்பதோடு, மாநிலத்தில் உள்ள வெவ்வேறு ஸ்லீப்பர் செல்களுக்கு ஆயுதங்களை விநியோகித்திருப்பதாகவும் எழுதினார்கள். நூற்றுக் கணக்கான இளைஞர் களை தீவிரவாதக் குழுக் களில் சேர்த்து விட்டிருப்ப தாகவும் இஸ்ரேலில் தயாரான ஏகே 47 உள்ளிட்ட ஆயுதங்களை வைத்திருப்பதாகவும்கூட அந்த செய்திகள் கூறின.

ஆனால் இந்த செய்திகள் அனைத்தும் எந்த அடிப்படையில் எழுதப்பட்டவை. ‘சொல்லப் படுகின்றன’; ‘சந்தேகிக்கப்படுகிறது’ என எத்தனை முறை இந்த செய்திகளில் மாறி மாறி வருகின்றன.

இந்த செய்திகளின் உண்மைத்தன்மையை குடிமக்களாகவும் நுட்பமான வாசகராகவும் எப்படி நம்புவது?

புனையப்பட்ட இந்த செய்திகளில் எவ்வளவு கசியப்பட்ட தகவல் இருந்தது? திறனற்ற நம் காவல்துறை எவ்வளவு திணித்தது? டி.ஆர்.பி. ரேட்டிங்கை ஏற்றவும் பத்திரிகை விற்பனையைக் கூட்டவும் மூத்த பத்திரிகை யாளர்களால் எவ்வளவு ‘காரம்’ தூவப்பட்டு செய்திகள் தயாராயின?

ஒரு கல்வி முறையான மாண்டிசோரிக்கும் க்யூபாவின் குந்தனோ விரிகுடாவில் அமெரிக்கா அமைத்துள்ள சிறைச்சாலைக்கும் கூட அவர்களுக்கு வித்தியாசம் தெரியவில்லை.

உதாரணத்துக்கு ஒரு செய்தியை பார்ப்போமா…:

கன்னட நாளிதழான உதயவாகினி, மங்களூரு பதிப்பு, தன்னுடைய இந்துத்துவ ஆதரவு நிலைப்பாட்டுக்காக அறியப்பட்டது.  அந் நாளிதழில் முதல் பக்க செய்தி:

“டிசம்பர் இறுதியில் ரியாஸ்தின் கவுஸ், முகமது ஆசிஃப், முகமது அபுபக்கர் மற்றும் ஹபீஸ் ஆகியோர் ஓர் ரகசிய கூட்டத்தை கூட்டினர். அதில் க்யூபாவின் மாண்டிசோரி சிறையில் மக்களை அடைத்து வைத்து அமெரிக்கா செய்யும் சித்திரவதைகளுக்குக் கண்டனம் தெரிவிக்கப்பட்டது. அப்போது வெளியிடப்பட்ட கண்டனத் தீர்மானத்தை ஒரு காவல் அதிகாரி கைப்பற்றியுள்ளார்”.

உதயவாகினி கன்னடத்தில் வெளியாகும் முன்னணி நாளிதழ், பல மூத்த பத்திரிகை யாளர்கள் அதில் பணியாற்று கிறார்கள். ஆனால் பாருங்கள். ஒரு கல்வி முறையான மாண்டிசோரிக்கும் க்யூபாவின் குந்தனோ விரிகுடாவில் அமெரிக்கா அமைத்துள்ள சிறைச்சாலைக்கும் அவர்களுக்கு வித்தியாசம் தெரியவில்லை. ‘எக்ஸ்க்ளூசிவ்’ ரிப்போர்ட்டை (எவரும் வெளியிடாத செய்தி) யார் முந்தித் தருவது என்பதில் இந்த உண்மைத் தன்மையைக் கூட அவர்கள் சரிபார்க்கவில்லை.

அது இருக்கட்டும், குந்தனோ சிறைச் சாலையில் அமெரிக்காவில் அத்துமீறல்களை கண்டிப்பது ஒரு குற்றமா? குந்தனோ சிறைச்சாலையில் கடைபிடிக்கப்படும் அநீதிகளை சுட்டிக்காட்டுபவர் தீவிரவாதியாக சந்தேகிக்கப்படுவாரா?

40 வருடங்களுக்கு முன், யு.ஆர். அனந்த மூர்த்தி தன்னுடைய ‘சம்ஸ்காரா’ நாவலை எழுதிய போது, சிலர் அதை பார்ப்பனர்களுக்கு எதிரானது என்று சொல்லி தடை விதிக்க முயன்றார்கள். ஆனால் பெரும்பாலான அறிவுஜீவிகள் அந்தக் கருத்தை மறுத்தபோது, மேற்கொண்டு எந்த நடவடிக்கையும் எடுக்கப் படவில்லை. அந்நாவல் படமாக்கப்பட்டதோடு, தேசிய விருது பெற்ற முதல் கன்னட படம் என்ற பெருமையையும் பெற்றது, உலகம் முழுக்க பல மொழிகளிலும் மொழியாக்கம் செய்யப்பட்டது.

சம்ஸ்காரா, பல பல்கலைக்கழகங்களில் பாடமாக வைக்கப்பட்டது. மங்களூரு பல்கலை யிலும்கூட  நாவலின் இந்தி மொழியாக்கம், இரண்டாம் ஆண்டு இளநிலை மாணவர்களுக்கு வைக்கப்பட்டுள்ளது.

இங்கே ஒன்றை சுட்டிக்காட்ட விரும்பு கிறேன். சங்பரிவாரங்கள் கடந்த ஆண்டு, கன்னட நாவலாசிரியர் எஸ்.எல். பைரப்பா எழுதிய ஆவர்ணா என்ற நாவலை மிகத் தீவிரமாக முன்னெடுத்துக் கொண்டிருந்தார்கள். நாவலின் 20 ஆயிரம் பிரதிகள் விற்பனையானதாக சொல்லப்பட்டது, கன்னடத்தில் வெளியான புனைவுகளிலேயே அதிக பிரதிகள் விற்பனை யானதாகவும் உறுதி செய்யப்படாத தகவல்கள் கூறின.

சங்பரிவாரங்களின் இந்துத்துவா அஜெண்டாவை கண்மூடித்தனமாக ஆதரிக்கும் பைரப்பா, தனது “ஆவர்ணா” நாவலில் அரை உண்மையை முழுப் பொய்யுடன் சேர்த்து புனைந்திருந்தார். வரலாற்று ஆய்வாளர்களின் ஆதாரங்களின் அடிப்படையில் எழுதியதாகவும் சொல்லிக்கொண்டார். இவர் சொன்ன வரலாற்று ஆய்வாளர்கள் பரிவாரங்களை சேர்ந்தவர்களே.  இந்த நாவலை படிக்கும் எந்தவொரு வாசகரும் இஸ்லாமிய சமூகத்தின் மீது பக்கசார்பான முடிவையே கொள்வார்.

இந்துத்துவ அஜெண்டாவுக்கு எதிராகவும், பரிவாரங்களின் விருப்பத்துக்குரிய எழுத்தாளர் பைரப்பாவை விமர்சித்த காரணத்தாலும்

யு.ஆர். அனந்த மூர்த்தியை பரிவாரங்கள் எதிலா வது சிக்க வைக்க நினைத்தனர். அவர்களுக்குக் கிடைத்தது, சம்ஸ்காராவின் சில பகுதிகள் ‘ஆபாசமாக’ இருக்கிறதென்ற குற்றச்சாட்டு. ‘பார்ப்பனர்களுக்கு எதிரான’ என்ற முத்திரை பலிக்காதபட்சத்தில், ஆபாச பகுதியை குழந்தை களுக்கு ஆசிரியர்கள் எப்படி போதிப்பார்கள் என்கிற குற்றச்சாட்டை சுமத்தினார்கள்.

சங்பரிவாரங்களின் அஜெண்டாக்களுடன் ஒத்துப்போகும் சில விரிவுரையாளர்களிடம் கையெழுத்து வாங்கி, பல்கலை பாடத் திட்டத்திலிருந்து நீக்க வேண்டும் என வலியுறுத்தினார்கள்.

மாநிலத்தின் அறிவுஜீவிகளாலும் முற்போக்கு சக்திகளாலும் காவிப்படையின் இத்தகைய செயல்பாடுகள் கடும் கண்டனத்துக்கு உள்ளா யின. தற்காலிகமாக அனந்த மூர்த்தியின் நாவலை பாடத்திட்டதிலிருந்து நீக்கும் நடவடிக்கை ஒத்தி வைக்கப்பட்டுள்ளது. ஆனால், உண்மையில் சங்பரிவாரங்கள் சக்கரத்தை காலில் கட்டி விட்டார்கள்.

அனந்த மூர்த்தியின் பிம்பத்தை சிதைக்கும் பணியில் ஒரு பிரிவு சங்பரிவாரங்கள் ஈடுபட் டிருக்கும் அதேநேரத்தில் மாநில பிற்படுத்தப் பட்டோர் ஆணையத்தின் தலைவரான சி.எஸ். துவாரகநாத் மீது தாக்குதல் நடத்துவது அவசியம் என இன்னொரு பிரிவு கவனமாக உள்ளது.

இந்த மாதத்தின் முற்பகுதியில் துவாரகநாத்தும் ஆணையத்தின் சில உறுப்பினர்களும் இணைந்து கூர்க்கில் பிற்படுத்தப்படுத்தப்பட்ட வகுப்பினருக்கு அங்கே உள்ள வசதிகளை ஆய்வதற்காக சென்றுள்ளனர். அப்போது சில உறுப்பினர்கள், தலைக்காவேரி என்னும் ஆன்மிக தலத்துக்கு சென்றுள்ளனர்.  அப்போது தலைக்காவேரியின் தலைமை பூசாரி, துவாரகநாத்தையும் அழைத்து வாருங்கள், அவருக்கும் புனித நீரை தருகிறோம் என்றுள்ளனர்.

அதற்கு, உறுப்பினர்கள், ‘அவர் ஒரு நாத்திகர், அவருக்கு இதிலெல்லாம் நம்பிக்கை இல்லை’ என்றிருக்கிறார்கள்.

துவாரகநாத்துக்கு இந்த சம்பவம் குறித்து எதுவும் அறியாத நிலையில், இந்த விஷயம் உள்ளூர் சங்பரிவாரங்களுக்கு எட்டியுள்ளது. அடுத்த நாள், தனது இரண்டு காவலர்களுடன் இருந்த துவாரகநாத்தை நூற்றுக்கும் மேற்பட்ட காவிகள் சூழ்ந்துகொண்டனர். முன்னாள் பாஜக எம்.எல்.ஏ தலைமையில் மது அருந்தியிருந்த கும்பல் துவாரகநாத்தை சூழ்ந்து, ‘ஏன் காவிரியை அவமதித்தீர்கள்? இந்துக்களின் நம்பிக்கைகளை அவமதித்துவிட்டீர்கள்… கர்நாடகத்துக்கு எதிரானவர் நீங்கள்’ என பேசியுள்ளது.

என்ன செய்வதென்றே தெரியாமல் நின்றிருந்த துவாரகநாத், திரும்பத் திரும்ப தன்னிலை விளக்கம் அளித்தார். ஆனாலும் அந்த கும்பல் சமாதானம் அடையவில்லை. அவரை தள்ளியும் உலுக்கியும் சுற்றியும் வந்த கும்பல், அவரை கட்டாயப்படுத்தி, கொக்கோலா புட்டியில் அடைக்கப்பட்ட காவிரி நீரை குடிக்க வைத்தது, கட்டாயப்படுத்தி அவருடைய நெற்றியில் திலகம் இட்டது.

சங்பரிவாரங்கள் தங்களுடன் அழைத்து வந்திருந்த உள்ளூர் பத்திரிகையாளர், உள்ளூர் தொலைக்காட்சி ஒளிப்பதிவாளர் ஆகியோர் அதை படம் பிடித்தனர். அது மாநிலம் முழுவதும் ஒளிபரப்பானது. அதுமட்டுமல்ல, அந்த கும்பல், தன்னுடைய செயல்பாட்டுக்கு துவாரகநாத் மன்னிப்பு கேட்டதாக தானாகவே ஒரு அறிக்கை ஒன்றையும் அனைத்து ஊடகங் களுக்கும் அனுப்பியது.

இந்த மூன்று சம்பவங் களும் தெளிவாக ஒன்றை சொல்கின்றன. கர்நாடகத் தில் உள்ள ஊடகங்கள் காவிமயமாகிவிட்டன. கர்நாடக பல்கலைக்கழகங்கள், சங்பரிவாரங் களின் காரணமற்ற கோரிக்கைகளுக்குத் தலை வணங்குசின்றன. இந்துத்துவப் படையினர், பிற்படுத்தப்பட்ட ஆணையத்தின் தலைவரையும் இந்து நம்பிக்கைகள் என்ற பெயரில் விட்டு வைக்க மாட்டார்கள் என்ற உண்மைகள் தெள்ளத் தெளிவாக தெரிகின்றன.

பீப்புள் டெமாக்ரடிக் ஃபாரம் (மக்கள் ஜனநாயகக் கழகம்) என்ற அமைப்பைச் சேர்ந்த பேராசிரியர் நகரி பாபையா போன்ற மதசார்பற்றவர்களை மேடை பேச்சில் ‘இந்து கடவுள்களை அவமதிக்கிறார்’ என குற்றம் சாட்டவும். குதிரே முக் வனத்தில் வாழும் பழங்குடி தலைவரான கல்குலி விடல் ஹெட்கே, தலித்துகளை அவமதித்தார்; அவருடைய மனைவி விபச்சாரத்தை ஊக்குவிக்கிறார் என குற்றம்சாட்டவும் பழங்குடி உரிமைகளுக்காக பணியாற்றுகிறவர்களை நக்ஸலைட்டுகள் என குற்றச்சாட்டவும் காவிகள் முனையும்போது, அதை காவல்துறை ஊக்கப்படுத்துகிறது.

சங்பரிவார் அமைப்பினர் கொடுத்த தவறான புகாரின் பேரில் உள்ளூர் அதிகாரிகளும் காவலர்களும் உள்ளூர் இஸ்லாமியர்களை சுற்றி வளைத்ததும் சமீபத்தில்தான் நடந்தது.  அதேநேரம், கால்நடைகளை ஏற்றிச் சென்றதற்காக இஸ்லாமியர்கள் மீது தாக்குதல் நடத்தப்பட்டபோது காவல்துறை கண்களை மூடிக்கொண்டது. ‘இராமன் சேது பாலம்’ பிரச்னையின் போது ஆர்.எஸ்.எஸ்.காரர்கள் ஒரு பஸ்ஸை எரித்து, அதனால் இரண்டு பேர் மாண்டு போன பின்பும் எவ்வித விசாரணையும் இன்றி இதே காவல்துறை அவர்களை விடுவித்தது. இந்த பட்டியல் போய்க்கொண்டே இருக்கும்…

சமீபத்தில், சிறீராம் சேனாவின் புரமோத் முத்தாலிக் ஒன்றைச் சொன்னார், ‘நாங்கள் ஹுப்ளியில் உள்ள சந்தேகத்துக்குரிய இஸ்லாமியர்களின் பட்டியலை தந்திருக் கிறோம். ஆனால் அவர்கள் ஒரு ஒருவரைத் தான் கைது செய்திருக் கிறார்கள். நாங்கள் கொடுத்த பட்டியலில் உள்ள அனைவரையும் கைது செய்யாவிட்டால், நாங்கள் அனைத்து இடங் களிலும் போராடுவோம்’.

தென்னகத்தின் நுழைவாயிலாக கர்நாடகத்தை சங்பரிவாரங்கள் எப்போதும் கருதுவார்கள். சென்ற முறை அதிகாரத்தில் இருந்தபோது, அவர்கள் காலூன்றும் அளவுக்கு இந்த கதவு கொஞ்சமாக திறந்தது. வெறுப்பின் விதைகளை ஊன்ற அதுவே அவர்களுக்கு போதுமானதாக இருந்தது. அந்த விதைகள் தற்போது முளைத்துள்ளன. இதோ தேர்தலுக்கு சில மாதங்களே உள்ளன, பாஜக அமோக விளைச்சலை அறுவடை செய்யப்போகிறது என்பதில் சந்தேகமில்லை.

28 பிப்ரவரி 2008 அன்று  ‘சுருமுரி’ இதழில் எழுதிய கட்டுரை

40 வருடங்களுக்கு முன், அனந்த மூர்த்தி தன்னுடைய ‘சம்ஸ்காரா’ நாவலை எழுதியபோது, சிலர் அதை பார்ப்பனர்களுக்கு எதிரானது என்று சொல்லி தடை விதிக்க முயன்றார்கள்.

ஒரு கல்வி முறையான மாண்டிசோரிக்கும் க்யூபாவின் குந்தனோ விரிகுடாவில் அமெரிக்கா அமைத்துள்ள சிறைச்சாலைக்கும் அவர்களுக்கு வித்தியாசம் தெரியவில்லை.

நிமிர்வோம் செப்டம்பர் 2017 இதழ்